كيف تقتل مصمم الجرافيك ببطء؟

​مهنة التصميم كلها تحديات، ويمكن بعض العبارات اللي يسمعها المصمم من العملاء تكون سبب حتى ولو غير مقصود في رفع الضغط.

مو دايمًا النقد هو اللي يهز ثقة المصمم، أحيانًا تعليق عابر من العميل كفيل إنه يسبب إعادة نظر في مسيرته كلها، نعال نشوف أكثر العبارات اللي تسبب معاناة للمصممين، وكيف نقدر نتفاداها.

١- "كبر الشعار بس شوي!"
اللحظة اللي يخافها أي مصمم، لما يكون الشعار مضبوط ومتناسق، لكن العميل يقرر إنه لازم يكون بالحجم العائلي!
تشرح له عن التوازن البصري؟ ما يقتنع. تعطيه أمثلة عالمية؟ برضه ما يقتنع.

إذا أبد مو مقتنع أن "الشعار مو لازم يكون ضخم عشان يكون مؤثر" الحل بسيط، جرب تسوي له نسختين: واحدة بالحجم اللي يبيه، والثانية بالحجم المناسب مع توضيح كيف كل واحدة تأثر على التصميم والتوازن البصري. أحيانًا لما يشوف الفرق، يقتنع.

٢- "فاجئني!"
التحدي الغامض! العميل يعطيك طلب مفتوح ويقولك "فاجئني"، لكن لما تجيب له شي على ذوقك فعلًا، يقول "مممم، مو هذا اللي كنت متخيله".

طيب وش كنت متخيل؟ حتى العميل للأسف ما عنده رؤية كافية، الحل؟ حدد معه نطاق واضح قبل البدء واعطيه أمثلة يختارها للتأكيد، عشان المفاجآت تكون على ذوقه، مو على ذوقك.

٣- "التصميم رهيب، بس.. نقدر نجتمع الساعة ٦ بعد الدوام؟"
أنت كشخص طبيعي، عندك حياة بعد دوامك، لكن بعض العملاء يعتقدون أن غيرهم روبوت متاح 24/7. ليش؟ لأن احيانًا يكون عندهم اجتماع بعد الدوام وما يمديهم يخلصون شغلهم بدري.

الحل؟ حدد قوانين واضحة لساعات العمل، وإذا كان الاجتماع خارج وقتك وتحتاج راحة، اشرح له إنك عندك التزامات ثانية (حتى لو كانت جلسة رواقة مع مسلسل) لأن راحتك دائمًا أولوية لصحتك.

٤- طلب تعديلات "عاجلة" الساعة ١١ الليل
هذي لحظة الرعب لأي مصمم، لما يجيك إشعار وأنت مرتاح في فراشك، ويفتح معك العميل موضوع "بس تعديل بسيط"، والكارثة إنه يتوقع الرد فورًا.

والحل؟ ببساطة لا ترد إذا كنت نعسان، النوم أهم.
وبعدها وضحله إن التعديلات العاجلة لها سعر إضافي، وشوف كيف فجأة تصير مو مستعجلة.

٥- "تقريبًا خلصنا، بس.."
بعد ساعات من الشغل، يوهمك العميل إن المشروع شبه جاهز، لكن فجأة يطلع لك قائمة تعديلات كأنك لسه بادي المشروع.

الحل؟ حدد عدد معين من التعديلات في الاتفاق، وإذا زادت، يكون فيه رسوم إضافية، كذا العميل يعطي أهمية ويحدد المتطلبات الصحيحة من البداية.

٦- "ما أقدر أدفع لك، بس بتكون إضافة رهيبة لملف أعمالك!"
المصمم ما يدفع الفواتير بـ"الفرصة العظيمة" أو بـ"الشغل اللي بيجيب لك عملاء". الحل؟ حدد سياسة دفع واضحة لـ ساعات عملك.​

وأخيرًا، نقدر نقول إن المعاناة حقيقية لكنها تعطيك خبرات كثيرة!
أكيد مو كل العملاء راح يكونون رهيبين، فيه ناس يقدرون عمل المصمم ويعطونه حقه، ويكون التعامل معهم ممتع وسلس. خلنا نقدر العملاء الجيدين، ونحاول نتجنب المواقف اللي تسبب سوء تفاهم مع البقية.